ബെംഗളൂരു: സ്വന്തമായി ഒരു വീടോ ഫ്ലാറ്റോ വാങ്ങാൻ ആഗ്രഹിക്കുന്നവർ സാധാരണയായി വിശാലമായ മാസ്റ്റർ ബെഡ്റൂമുകളും മനോഹരമായ കാഴ്ചകൾ സമ്മാനിക്കുന്ന ബാൽക്കണികളുമാണ് തിരയാറുള്ളത്. എന്നാൽ, ബെംഗളൂരുവിൽ നിന്നുള്ള ഒരു ഫ്ലാറ്റിന്റെ പരസ്യമാണ് ഇപ്പോൾ നവമാധ്യമങ്ങളിൽ വൻ ചർച്ചയ്ക്കും ചിരിക്കും വഴിവെച്ചിരിക്കുന്നത്. കേൾക്കുമ്പോൾ അവിശ്വസനീയമെന്ന് തോന്നാമെങ്കിലും, മനോഹരമായ കാഴ്ചകൾ കാണേണ്ട ബാൽക്കണിക്കുള്ളിലാണ് ഇവിടെ വെസ്റ്റേൺ ശൈലിയിലുള്ള ഒരു ക്ലോസറ്റ് (ടോയ്ലറ്റ്) സ്ഥാപിച്ചിരിക്കുന്നത്.
പഴയകാല ഗ്രാമീണ വീടുകളിൽ പ്രധാന കെട്ടിടത്തിൽ നിന്നും മാറി പുറത്തായി കക്കൂസുകൾ നിർമ്മിക്കുന്ന ശൈലി ഓർമ്മിപ്പിക്കുന്നതാണ് ഈ ഫ്ലാറ്റിന്റെ ഘടന. ഫ്ലാറ്റിന്റെ ലിവിങ് റൂമിനോട് ചേർന്നുള്ള ബാൽക്കണിയുടെ കമ്പിവേലികൾക്ക് തൊട്ടടുത്താണ് ഈ കമ്മോഡ് ഘടിപ്പിച്ചിരിക്കുന്നത്. ഇതിനൊപ്പം ഫ്ലഷ് ടാങ്കും ഹാൻഡ് ജെറ്റ് സ്പ്രേയുമെല്ലാം കൃത്യമായി സജ്ജീകരിച്ചിട്ടുമുണ്ട്. ഫ്ലാറ്റ് കാണാനായെത്തിയ ഒരു യുവതി ചിത്രീകരിച്ച ദൃശ്യങ്ങളിലൂടെയാണ് ഈ വിചിത്ര നിർമ്മിതി പുറംലോകം അറിഞ്ഞത്.
യുവതി ഫ്ലാറ്റിലൂടെ നടന്ന് ബാൽക്കണി വാതിൽ തുറക്കുന്നതിലൂടെയാണ് വീഡിയോ ആരംഭിക്കുന്നത്. പച്ചപ്പും നല്ല വായുസഞ്ചാരവുമുള്ള കൺകുളിർക്കുന്ന ഒരു സാധാരണ ബാൽക്കണിയാണ് ആദ്യ കാഴ്ചയിൽ പ്രേക്ഷകർക്ക് അനുഭവപ്പെടുന്നത്. എന്നാൽ തൊട്ടടുത്ത നിമിഷം ക്യാമറ തിരിയുമ്പോഴാണ് ബാൽക്കണിയുടെ ഒരു കോണിൽ ഫ്ലഷ് സിസ്റ്റത്തോട് കൂടിയ ടോയ്ലറ്റ് സ്ഥാപിച്ചിരിക്കുന്നത് കാണാനാകുക. ബാൽക്കണിയിൽ എന്താണുള്ളതെന്ന് കാണാൻ അവസാന നിമിഷം വരെ കാത്തിരിക്കൂ എന്ന അടിക്കുറിപ്പോടെയാണ് ഈ വീഡിയോ സോഷ്യൽ മീഡിയയിൽ പ്രചരിക്കുന്നത്.
വീഡിയോ വൈറലായതോടെ വിചിത്രമായ പ്രതികരണങ്ങളുമായി നിരവധി നെറ്റിസൺമാരാണ് രംഗത്തെത്തിയത്. ഇതിന് മറുപടിയായി മറ്റൊരു സോഷ്യൽ മീഡിയ ഉപയോക്താവ് പങ്കുവെച്ച ചിത്രം ഇതിലും ഏറെ അമ്പരപ്പിക്കുന്നതായിരുന്നു. അഞ്ചാം നിലയിലെ ഒരു വീടിന്റെ തുറസ്സായ ബാൽക്കണിയിൽ ഇന്ത്യൻ ശൈലിയിലുള്ള ക്ലോസറ്റ് ഘടിപ്പിച്ച ചിത്രമാണ് റെഡ്ഡിറ്റ് (Redditor) ഉപഭോക്താവ് പങ്കുവെച്ചത്. അതേസമയം, പുകവലിക്കുന്ന ശീലമുള്ളവർക്ക് രാവിലെ പ്രകൃതിഭംഗി ആസ്വദിച്ച് കാര്യം സാധിക്കാൻ പറ്റിയ ‘ഏറ്റവും അനുയോജ്യമായ’ ഇടമാണിതെന്ന തരത്തിലുള്ള രസകരമായ ട്രോളുകളും കമന്റുകളും ഈ പോസ്റ്റിന് താഴെ നിറയുന്നുണ്ട്.
